استكمالن لمجموعه الدروس العمليه في طرق المغازله يسعدنا ان نعرض اولا بعض الطرق الاخرى في المعاكسه تم استرجاعها من ارشيف الذكريات ربما تفيدكم واتمنى ان تحقق هذه الطرق الامل المنشود صحيح احنا بنتعب كتير علشان شباب مجالسنا احنا هدفنا ان الشباب يتثقف ويتوعى ويكون لديه كافه الخبرات في مختلف امور الحياه واعتقد ان المغازله سواء كانت في التليفون او في الشارع هي احدى مجالات الحياه لذا يجب ان نلم بكل جوانبها وهذا مجرد جانب من جوانب الحياه

عزيزي الشاب، جربت تعاكس بنت قبل كدا ؟
أكيد مش حأقول عزيزتي الفتاة هل اتعاكستي قبل كده؟ لأن مفيش واحدة في الدنيامتعاكستك إلا اذا كانت اعوز بالله من الشيطان الرجيم زي ال ….. .. خلونا نبعد عن البنات شوية ونشوف الشباب المقهور لما يحب يعاكس بيقول إيه ؟ وبيعمل إيه ؟!
تهريج ..

مثلا تلاقي ثلاث بنات ماشيين ووراهم اتنين مثلا انا والصلهام واحد بس اللي بيتكلم من الولاد ومركز مع واحدة وهو الصلهام ويقول للبنت ( تتجوزيني والعصمة تبقى في إيدك ؟؟ … تتجوزيني وأغسلك الصحون؟؟ .. طب تتجوزيني وأرضع العيال ؟!! ) وتلاقي التلاتة ماتوا على نفسهم من الضحك .. طبعا هو لا حيتجوزها ولا حيرضع العيال ولا حيشوف خلقتها بعد كدا .. بس بيضيع وقت وبيسلي نفسه ..

أو برضه تلاقي بنتين ماشيين وواحد بيكلم صاحبه ( أحلى واحدة فيهم اللي لابسه جزمة سودا ) .. ويا ويلهم لو لمحوهم بيبصوا على جزم بعض !! يأخذوهم تريأة للصبح!
مامتك نحلة ؟
وفيه معاكسات مفتكسة، مثلا الصلهام يرمى كلمة يحاول يشد انتباه البنت، زى واحدة ماشي في حالها لا بيها ولا عليها تلاقي واحد متعرفوش بيبصلها وفجأة يقف قدامها ويقولها ( لازم ماما كانت نحلة !! ) طبعا البنت حتفكر ( هو بيجيب سيرة الأم إبن الــ .. )
أو مش حتفهم عاوز ايه .. فحترد بنعم .. أو أفندم ..أو بتقول إيه يا جدع إنت … هنا الواد ينط ويقولها بسرعة ( عشان تجيب العسل دا كله !! ) وهو شطارته بقى بعد كدا..

بس مش دايما الشطارة بتنفع .. واحد جرب الموضوع دا وقال أول جملة .. راحت البنت بصاله بمنتهى الثقة وقالته له ( إشمعنى ؟ ) بعد ما خلص جملته راحت قايلاله ( تصدق .. وإنت لازم ماما كانت فرخة .. عشان تجيب البيض دا كله !! ) طبعا الصلهام قعد تلات أسابيع بعدها في البيت .. لحد ما يفقس !

والمعاكسات برضه مقامات يعني معاكسة الماشيين غير معاكسة الواقفين، وأصحاب العربيات لهم طرقهم الخاصة تلاقي واحد بعربية واقف قدام واحدة وهات يا كلاكس يعني بوري عند اخوانا الخليجيين وعمّا ل يشاور على تحت وعامل مجنون في العربية .. وبعدين يرجع مارشدير برده دي يعني ريوس عند الخليجين وهو باصص للبنت وبيقولها وهو مخضوض ( النمرة .. النمرة !! )..

طبعا البنت شافت نمرته وهو بيرجع أو مشافتهاش بس فهمت إنها نمرة العربية من إشارته لتحت فحتقوله مالها ؟ .. هنا بقى تلاقي وش جديد تماما بيقولها ( مبتجمعش ! … متديهالي تاني ؟! )
صوت حريمي .. اقفش !

المهم نيجي لموضوعنا الجديد المعاكسه في التليفون

دي فن كبير جدا

بس ليها عيوب كتير ومميزات كتير

نتكلم عن العيوب

اول حاجه انك الحاجه الوحيده الي تعرفها عن البنت صوتها

يعني ممكن تكون وحشه جدا بس صوتها حلو وبعد متفضل تعاكس وتعاكس

وبعد ما تعمل مجهوود كبير تيجي تقابلها تلائيك احلى منها ولا تلائيها واحد صاحبك

تاني حاجه ممكن تكون عندها سبعين سنه اساسا بس عايشه فتره مراهقه متاخره وتاكل احسن مطب صناعي في حياتك

ممكن تعرفك لان رقمك بيظهر عندها وساعتها بيكون مشكله

لو اعطت الرقم بتاعك لبابا او اخوها

فنصيحه دايما متتكلمشي من تليفونك ودايما شيل رقم احتياطي من غير اسم يعني حاجه سبيشيال للمعاكسه

يعني

ومع ان المعاكسة في التليفون قدمت قوي إلا إنها لسه شغالة لحد دلوقتي ولان الدنيا اتطورت والتكنولوجيا دخلت البيوت وفي ظل نظام إظهار الرقم ظهرت خدمات المعاكسات من تليفونات ميناتل والنيل ورينجو، يعني الشاب من دول يشتري كارت بخمسة أو بعشرة وهاتك يا نمر وهو ونصيبه وأول ما يرد عليه صوت حريمي يقفش فيه .. كدا على طول من غير ما يعرف مين دي ولا سنها وشكل اللي جابتها عامل إزاى ( مش بأقولكوا شعب حميمي !! )

وطبعا كل عشرتلاف مكالمة ممكن واحدة تكمل معاه عشر دقايق على الخط،، وفي الأغلب حتبقى واحدة عندها 60 سنة فاضية هى كمان وبتشوف العيال المجانين دول بيعملوا إيه قبل ما تقفل !

وفيه معاكسة التليفونات المقصودة .. ودي عادة في المدارس .. واحد خد موبايل واحدة معاه في الفصل ميعرفهاش من واحد صاحبه وقعد يزاولها من أى كابينة تليفون .. أو يكون شافها مرة مع حد من صحابه وياخد تليفونها ويبتدي يظبط هو .. المهم .. التليفونات أثبتت إنها كانت ولازالت وسيلة مهمة للمعاكسة !
من حقهم برضه !
قلت في أول الموضوع خلونا نبعد عن البنات شوية ، بس مش معنى كدا إننا ننساهم ..لأنهم لب الموضوع يعني لو مفيش بنات الشباب هيعاكس مين؟
وطبعافي ظل المساواه بين الرجل والمراه المعاكسة طبعا لازم المرأة تساوي الرجل في كل حاجة حتى المعاكسة ..!

والجديد دلوقتي إنك تلاقي بنتين – عادة لابسين لبس المدارس الأبيض في كحلي – ماشيين ورا واد وبيعاكسوه، والأجدد بقى إنك تلاقي الولد خايف منهم وبيبعد – هما عادة بتبقى أشكالهم تخوف ! – وهما ماشيين وراه وبيقولوا ( القطة خايفة ولا إيه ؟! ) ..

بس مش معنى كدا إن كل البنات اللي بيعاكسوا وحشين .. في بنات زى القمر وخبيرة معاكسة .. يمكن من كتر ما سمعوا ! بس الموضوع بقى بالنسبالهم وسيلة تهريج .. just having fun) )

وبمناسبة أخينا اللي كان طالع يجري فوق دا .. في ولاد كل مشكلتهم إنهم مبيعرفوش يعاكسوا ! وخصوصا لو كان صحابه خبراء في الموضوع دا .. ويا سلام بقى لو حصل تجاوب بين صاحبه والبنت اللي بيعاكسها ! حتلاقيه واقف بيضرب نفسه 100 جزمة !

ملحوظه الموضوع على سبيل المرح والتهريج والترفيه واحزركم من اي حد يعاكس انا غير مسؤل