- This topic has 3 ردود, 4 مشاركون, and was last updated قبل 22 سنة، 4 أشهر by
.
-
المشاركات
-
أول أيام الدراسة….
مساء الخيرات جميعا…..موضوعي هذا إهداء الى جميع اللي بيداومون في المدرسة يوم
السبت…(تراني ما أقصد تحدوه أبدددددد… )
(عاد مساكين إجازة نص السنة ثلاث أيام …اللهم لا شماتة)
بسم الله نبدأ…
صباح اول يوم بالدراسه ودحروج منبطح على فراشه وصاحي… بس
مايقدر يقوم من سمنه…
وتدخل عليه امه وتفتح البابين اللي بغرفته حتى ماينشب اذا طلع..
وهو يومي بيديه ورجليه فرحان باول يوم دراسه….
وتدربيه امه لين وقف على رجليه… وتصحي اخوانه وتنزل للمطبخ تجهز
الفطور….
ودحروج دخل حمامه الخاص ويناظر جسمه بالمرايات الطوال اللي على
كل الجدران مركبها ابوه… لان الضعيف من سمنه مايقوى يشوف غير
يديه والمرايه الصغيره اللي فوق الغساله مايقدر يشوف فيها نصفه
الحدري….
وقد راح ثلاث مرات للمدرسه من غير سروال.. لكن من عقب
هالمرايات ودحروج ساترن عمره…
ويغسل وجهه بالمغطس…. ويمسح وجهه ببطانيه…. ويطلع من الحمام
ويدخل غرفته… ويلبس ثوبه …ويحط شنطته بمخباته… وينطلق على
المطبخ ويفطر مع اخوانه…. ويشرب له وايت حليب وتعطيهم امهم
فسحه كل واحد صاموليه جبن وريال… و تعطي دحروج أربعمية ريال
وصاموليه من الصامولي الفرنسي الطويل…
وتلبسه امه كنادره ( الله يعزكم )…
ياعزتي بس لكنادره من زود الثقل مرتفعه من قدام كانها مسويه غزاله
ورقم المقاس تشوفه من غير ماتقلبها. .. واذا مشى تسمع لها صوت
الله لا يلومها ….
ويطلع هو واخوانه ويوقفون قدام باب الشارع… يقشمون فصفص ودحروج
يقشم جوز هند.. .. يتسلون لين يجيهم السواق…
ويجيهم السواق بسياره ددسن غمارتين…. ويركب اخوانه بالغمارة
ودحروج ماركب واقف على عتبة الباب… ويركب السواق الددسن ويدق
الريوس ويطابق على عتبة الباب وينزل ويفتح باب حوض الددسن ويركب
دحروج.. وترتفع خشة الددسن والصدام اللي ورى شوي ويحك بالارض.
ويصك السواق باب الحوض ويركب الموتر ويشغل الفلشر وويشوت
لمدرسه دحروج يوصلونه الاول حتى ترتاح الددسن من الحموله.. واخوانه
ما يتفشلون عند مدارسهم …..
ويوقف السواق قدام باب مدرسته ويفتح حوض الددسن لدحروج ويدربيه
لين وقف على رجليه …ويدخل دحروج المدرسه وهو يمشي بالطابور..
رن جرس المدرسه ويركضون الطلاب الجدد فرحانين… ويصفون طابور
ودحيريج صف طابور لحاله… ويتكلم وكيل المدرسه بالمكرفون يرحب
بالطلاب …وعقب ماقضى الوكيل ادخلوا الطلاب الفصول الا دحروج
مادخلوه خلوه واقف بالطابور وياخذ مدير المدرسه المكرفون من الوكيل
وقال بالمكرفون : يادحروج حنا قبلناك تدرس عندنا عقب ماوقع ابوك
على ورقه انك ماتستعمل حمامات المدرسه حتى مانتوهق عقبك
وماتركض حتى ماتصدع جدران ودرايش المدرسه وماتدخل الفصل
بالمره لان ماعندنا كرسي يشيلك ولا فصل قدك لكنك تقدر تدرس وتابع
الدرس من ورى الدريشه ….
ويهز رويسه ابوالدحاريج ويمشون طابوره ويوقف عند فصله ويجلس يتابع
المدرسين من ورى الدريشه وعقب الحصه الثالثه رن جرس الفسحه
ويظهرون الطلاب بالساحه يركضون.. وهو يمشي ووسط الساحه وقف
واظهر فسحته الصاموليه من مخباته …ويعرم منها عرمه ويطير نصها..
والطلاب يتسابقون عليه ويصفون طابور طويل وراه يحسبونه المقصف وهو
يحسبهم يلعبون معه قطار وهواللي يركض مبسوط ويصايح ..يقول
طووووووط… طوووووط… وترتج المدرسه والمدير في مكتبه طاح
من على كرسيه وانكب عليه الشاهي ويتوزى حدر الطاوله يحسبه زلزال
ودحروج يركض مستانس… ويظهر جني من حدر الارض وينادي على
دحروج يقول : انت يالتفخ ازعجتنا وازعجت عيالنا ان كانك مطول بتركض
علمنا نشد من حدركم .. دحروج من الروعه وقف وشفط هوا بقوه وانتفخ
اكثر من ماهو منتفخ …
ويفتح المدير دريشته ويويق وعقاله طايح على رقبته ونظارته تدودل على
اذنه اليسار ويناظر بالساحه ويشوف الطلاب كلهم متسدحين تقول
واحد لاعب بهم بولينغ …
ويصايح المدير وهو خايف بصوت مبحوح : وش فيه وش اللي صاير ويعلمه
واحد من الطلاب ان دحروج كان يركض ويصرخ المدير على دحروج
هالمره بدون بحه : … رجيتنا..الله يرجك …الله يرجك …. انا ماقلت لك
لاتركض اظهر من المدرسه انت مفصوووول مفصووووول ….
دحروج ماقوى يتحمل ودمعته تبي تنزل بس مالها نفس وهو اللي
يينطلق على غرفة المدير يبي يعتذر.. وياخذ المدير عقاله ويطق دحروج
اطلع من مكتبي اظهر عن مدرستي انت.. مفصووول.. مفصصول..
وتقفل مع دحروج وهو اللي يشيل المدير ويخبط به بالارض ويبرك عليه
ويدخلون المدرسين فازعين للمدير ويدفون دحروج ويطردونه من
المدرسه والمدير اختفى !!! مالقوا بالغرفه غير شماغه ونظارته طايحه
على الارض والدريشه مفتوحه …..
ويطلع دحروج من المدرسه ويمسك الشبك من برا ويناظر بالساحه
والمدرسه ودمعته ناشبه بعينه …ويجي وراه سيرلانكي معه هلل يحوم
عليه يدور على باب يدخل معه يحسبه كابينة تلفون وهو اللي يمسك
السيلاني بغاربه ويكمخه بالشبك ويطيح السيلاني فاق اثمه مغشي
عليه ( احمد ربك مابرك عليك ) …
وهو اللي يعطي المدرسه ظهره ويمشي ودمعته الناشبه بدت تنزل
بس بتبطي ماطاحت بالارض من كبر وجهه …
المهم انه وصل وسط السوق بدون مايحس ويجلس من التعب على
الرصيف ويشوفونه هنود بالسوق ويتجمعون عليه والهنود اللي بالمحلات
بعضهم يعلم بعض وسكروا دكاكينهم وجوك ركض على دحروج وسواويق
اللوموزينات يوقفون سياراتهم وسط الشارع وركض على دحروج الشارع
تسكر من الزحمة ويتجمعون هالهنود حوله يلمسونه ويصايحون بوذا بوذا
اشوى ان المرور كان قريب منهم ويفرقونهم ويسحبون دحروج بالونش
ويوقفونه بحجز السيارات ويكلمون ابوه ويجيهم ويدفع غرامة الوقوف في
مواقف الباصات ويظهرونه من الحجز
ويطلع دحروج مع ابوه وشكله تعبان وجسمه فيه جروح من سحب
الونش
ويركبه بحوض الددسن وينطلق به للمستشفى ويتجمعون عليه
الممرضين يفصخون ثوبه ويظهر عليهم سره مربوط ببكله ويعالجونه من
الجروح وعقب ماخلصوا غطوه بشراع وكلموا الدكتور يجي يكشف عليه
وابوه واقف عند راسه يسولف على ولده ويعلمه ان وكيل المدرسه
اتصل عليه وعلمه باللي صار وانهم مالقوا المدير ولا يدرون وين طس له
الا ياولدي ماتعلمني وش سويت انت بالمدير ؟
ويدخل عليهم الدكتور ويرفع الشراع عن دحروج ويحط السماعه على
صدره ويناظر في بطنه وهو مستغرب من سره المربوط ببكله
ويمد الدكتور يده على البكله ويمعطها وينفتح سر دحروج ويطلع عليهم
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
راس مدير المدرسه وهو يصارخ انت مفصوووووول مفصووووووول …..يارب ماثقلت عليكم والعذر والسموحة على الاطالة بس مافيني نوم وش اسوي؟؟؟
- يجب تسجيل الدخول للرد على هذا الموضوع.