إيه المانع يعني ….
ما نجرب نحلم شوية بصوت عالي …
خلينا نخرج كل أحلامنا من جوانا
و نبدأ نتكلم فيها
يمكن لما نناقشها مع بعض تبدأ تاخد شكل حقيقة
حتي لو حقيقة بعيدة
حتي لو حقيقة صعبة
و علشان أكون أول واحد
هابدأ بحلمي
أكبر أحلامي
بيت …….
بيت حلو وكبير وياسلام لو بجنينه وسعة …
زوجة بتحبني و بحبها …..
وبنت و ولد زي العسل …. مطلعين عيني طول النهار …
آخر شقاوة …..
حياة مستقرة هادئة …..
فيها كل الناس بتحب بعض …
فيها كل الأطفال بتضحك …..
فيها كل اخ بيخاف علي اخوه ….
كل صديق بيفدي صديقه بعمره …
كل حبيب يبموت لو شاف دمعة حبيبه …
فيها الوعد وعد ….
فيها كلمة الحق سيف ….
فيها الشهامة و الرجولة و الكرامة و الكبرياء ….
فيها الكل بيخاف علي الكل …..
فيها الكل إيده في إيد الكل …
دنيا كلها بالألوان ……
مافيهاش حاجة أبدا إسمها كدب ….
مافيهاش حاجة إسمها خيانة ….
مافيهاش حاجة إسمها مصالح …..
مافيهاش حد بيتاجر بمشاعر الناس علشان مصلحته …
مافيهاش أخ بيخون أخوة علشان أتفه حاجة …..
مافيهاش صديق يبيع صديقه ….
مافيهاش إنسان بيتخلي عن مبادءه علشان يوصل أسرع ….
مافيهاش حبيب بيخون حبيبه علشان طريق أقصر و أسهل ….
ياااااااااااااااااااااااه ….. شوفتوا بقي كتبت كام مافيهاش …
أديني فقت من الحلم …
يمكن يكون فعلا حلم …
بس كتير أوي بيساعدني اواجه الواقع …
بيساعدني أفضل أحارب علشان أفضل صح ….
بيخليني أثبت مكاني …
من غير ما اتنازل …
من غير ما أشك و لو للحظة …
إن الصح هايفضل طول عمره صح …..
مهما حاولت إيدين كتير تشوهه ….
و دلوقتي بقي إيه رأيكم …
تيجوا نحاول نحلم مع بعض ؟؟؟؟ يالا نجرب …