يا خارفين الرطب حنوا وخلوني
**روحي خلالة معاكم والجسم ليفه
لا تخرفوني بسر لحظة تريوني
**بكرة عضوق الرطب تملا مخاريفه
ويا مصيفين بمصر بالله فكوني
**الصيف في ديرتي أبهى تواصيفه
لا بسركم لا رطبكم غزر بعيني
**القيظ بفراقهم ما عاد له شيفه
محلا شواطي بحرنا ورملها الصيني
**ومحلا نسيم الخليج ويا حلا سيفه
يا ما سكبته غزير الدمع من عيني
**هتان شوق الولايف من مغاريفه
أبكي فراق الأحبة وأصفق أيديني
** صارت حياتي بعدهم ضنك ومعيفه
وين الي بسمته يا ناس تحييني
**رعبوب ليمن رمس محلا سواليفه
وينه غريمي حبيبي وأجمل أسنيني
**واللي هواه بهواي وكيفي بكيفه
واللي برقة أحساسه يداريني
**وافي ومن طيبته رافع تكاليفه
جو المصايف بدونه ما يسليني
**كأني مشتي معاكم وأنتظر صيفه

الشاعر عبد العزيز العقيدي
منقول