بعد ماي الفرات لضيفنه انبديه
والگطان الازرگ مانكر شصّه
وكل اسباب جوعي ابدون استثناء
كلهه تروح فدوه لورقة الحصّه
گبل خطار اجاني وصادفة عوز
على خدودي شمع ذابة الگصه
ولان تنوري طين وغيرته من الگاع
خلص عدنه العجين استنسخ الگرصه
هسه اشبينه ليش وشختلف بالناس
اذا يلتفت ضيفك ينوكل نصّه
اهلنه البيت واحد شو صفو ضدين
ملّه تلوم ملّه وبالگلب غصّه
اركض طاح اخوك بضهره حط سچين
لاغيرك يذبحه تفوتك الفرصه
سكرانه العداله وناس تاكل ناس
زمن صارن خوات العلوه والنصه
طم هور الچبايش وانفي كردستان
وبگلب الرمادي خنجرك رصه
ولك مو عيب واحنه الي نشيل الراس
شلون چفوفنه اتكض راسنه اتگصه
اختلفنه احنه بعلي وبعمر وبعثمان
لويدري محمد بينه ماوصّه
المحتل اطلعه حط اديك وياي
يامحتل طلع بالهوسه والخبصه
گطرة حيه انه واتّگصّه
ايعرفنه النشد عنا والتگصه
احنه بجسم واحد والتگصه
چفك لاتضن گصيت اديه
فدوه ارجوك تهده وتلعن الشيطان
عسى من غيراك ابخته وبحضّه
انه شردة منك غير ننسه الراح
وطرفك عالزعل بيناتنه اتغضّه
انفطمنه اعله البنادق وانته تعرف زين
الشعيره بلا نفع لوزعلة الفرضه
انه وياك سيف ونذبح الجلاد
واذا تعجز ادينه بلوزته انعضه
چاشنهي عليمن ليش مختلفين
انا شنهو القبلته وانته الترفضه
يجوز الما اكضه الخلل بالچفين
اليعبر عليه چفوفك اتكضه
انه غرگان يمك ها يخو عثمان
البجسر الائمه ماصفن لحظه
شاف الايد وحده وناس ضكهه الماي
على گد الچفوف الصاحته اتشظه
انه دجلة الخير المانست عطشان
واخوي انته الفرات وترضه ماترضه
اختلفنه باولياء الله .. وضعنه
واحنه ساس للدنيه ..وضعنه
وربك مانغير من .. وضعنه
شرط الا..تحط ايدك بديه