انا بصراحة من الناس اللي ما تحب تطرح مواضيع.. افضل اكتب ردود وبس ..

بس اللي خلاني اطرح هالموضوع هو قهري و غمي من اللي اشوفه هاليومين .. ياريت إذا حد منكم يرد علي و يقوللي ويش الحل ..

ليش الشحاتين و المتسولين زادوا في مسقط هالايام؟؟ .. يعني احنا لازم نشكر الله و نحمده للأننا من ابناء هالبلد .. و الله يطول في عمر السلطان اللي ما خلانا محتاجين .. و الحكومة اللي تقوم بجهود عظيمة لمساعدة المحتاجين .. و لتوصيل العلم الى كل جزء من أجزاء السلطنة ..

بصراحة انا انغم كثير يوم اشوف شخص يشحت .. و اعصب بطريقة ما تنوصف ..

انا اشتغل كممرضه في احدى المستشفيات .. ولازم اعترف اني اتعلمت الكثير من خلال شغلي.. اتعرفت على ناس وناس.. و شفت مصائب وبلاوي .. وشفت ناس يحاولوا المستحيل عشان يثبتوا انفسهم ويكونوا اعضاء نافعين في المجتمع .. على سبيل المثال الشهر الماضي كنت اتكلم مع واحد من المرضى (كان متضايق لأنه جالس في المستشفى فترة طويله و ما يقدر يروح دوامه) مع العلم ان هذا الشخص معوق ما فيه رجول.. بس يشتغل شغل اداري.. لكن ما شاء الله عليه … من العلم و الثقافة اللي فيه .. وجاء الغم بعد يومين تقريبا كنت طالعه من سيليكت اللي في الخوير.. جاني واحد شحات .. شايل معاه كيس حاط فيه شوية ادوية .. اوين ويش؟؟ “انا فقير عطيني ريال شوفي الادوية انا مريض السكري و ما عندي شي آكله” مع العلم انه هذا الشخص شاب (بين 35 – 40 سنة) وسليم، يعني ما ناقصه لا رجل ولا ايد .. وايش جالس يسوي؟؟ يشحت لا بعد .. لابس دشداشه و مصر يعني كأنه يوري العالم انه العمانين شحاتين .. بصراحه انغميت .. حاولت اكلمه بهدوء و اقوله احسن له يدور على شغل ولو شغل بسيط يكون احسن له بدل التسول .. بس الانسان ما كان فيه ذرة حياة .. كان مصمم لازم اعطيه ريال لأنه فيه السكري.. عصبت و طردته و قلتله ويش فيها اذا فيك السكري .. هذا ما يمنعك تشتغل ..

والغم الثاني جاني البارحه .. كنت في ماكدونالدز الصاروج .. جاني ولد صغير.. يعني حوالي 9 – 12 سنة .. جاي يشحت عندي و يقول.. انا فقير عطيني فلوس .. بصراحه ما عرفت ايش ارد عليه ..

ايش اللي خلى هالولد يشحت؟؟ الفقر؟؟ ما اظن .. سوء التربية هي اللي خلته يشحت ..

يا عالم يا ناس .. لازم تفهموا ان التسول حرام في الاسلام .. والمتسولين ما لهم نفع في المجتمع .. الفقر ما عيب، بس العيب انك ما تحاول تحسن من وضعك.. العيب انك ما تتعلم بالرغم ان التعليم المجاني متوفر في بلدك.. العيب انك تتذلل للناس بدل ما تشتغل و تكدح .. العيب انك تكون عايش في مجتمع وما تنفع ولا حتى تحاول انك تكون شخص نافع في مجتمعك ..