… أدري طريقي صعب

… وأدري فراقك صعب

… حتى رجوعي صعب

مابه حلول .. لكن بقول

تعذبي يوم..يمكن شهر

انسي السهر.. وانسي القهر

.. وانسيني

عيشي حياتك كلها..بحلوها وبمرها

يمكن تلاقي لك حبيب.. يصير لجروحك طبيب

وترجع فرحتك ثاني.. وتنسى الحب وتنساني

…وتترك ديرة احزاني

وأشوفك في ليالي الصيف.. تمر جنبي كأني ضيف

وأشوفك مع حبيب ثاني.. أشوف بعيونك الفرحه

وحزني شوه أجفاني.. وقلبك انبرى جرحه

..وقلبي انجرح ثاني

جلست أذكر أمانينا… ودمعي حرق أوجاني

وتذبحني أغانينا.. وهي جنبي مع ثاني

تضم يدينها بيده ..كأن اليوم ذا عيده

… وأنا يدي على خدي

… وهمي والزمن ضدي

..صعب

سلطان المسلّم

عذبت سمعك بصوت الحب يامنادي

ياللحزن كيف دمعك يبكي عيونه

وعكرت صفو القلوب وجوها هادي
ذكرتها بالحنان وعشت من دونه
مشتاق شوق المطر لمعانق الوادي
ومحتاج حاجة غريب الروح لشجونه
أسير الإحساس مثل البلبل الشادي
غرد حزن والملا طربان للحونه
ميلاد صوتك يصادف يوم ميلادي
ياشاعر الحزن خذت الليل من لونه
الحب صوتك يزف الريح للكادي
يرقص على نفحته ويعانق غصونه
الحب دربك وشكّل حزنك ابعادي
الحب منطق وقمة عقله جنونه
قلب يعيش الغلا لا يمكن يعادي
لو يصبح الموت عشقه حاول يصونه
من عاش عمره وفا..ظن الوفا عادي
لو حس بالحب مره حرم يخونه
أسمع صدى صوت قلبك للهوى ينادي
ينطق لك الصمت ويلبي لك سكونه

سعد بن سعود .. منادي

أنا إنسان مع نفسي قبل لا اكون معك إنسان

لـي مبـدأ ولـي نظـرة تحكمني قناعـاتي

أحاسيسي حقيقـه ثابته بالوصل والهجران
أنا طبعي اذا حبيت .. أحب بكل حـالاتي
منادي والندا نابع من الوجدان للوجدان
إذا ما ينطق احساسي حديثي يشبه سكاتي
غموضي في الهوا تصريح وسره يفضح الكتمان
ونظـرات الوله والوجد هي أجمل عبـاراتي
ولا اجامل باحاسيسي ولا اقبل في الهوى احسان
ولا للمصـلحـه يـا سيـدي دور بعـلاقـاتي
ولو ألغي شعوري ما بقى لي صاحب ولا خـلاّن
يرافـقني على مر الزمـن جرحـي ودمعـاتي
أحب الصدق واعمل به كسبت أو كنت أنا الخسران
ولـو صـدقـي يخسّـرني تشـرّفنـي خسـاراتي
رفيق العمر لو تجفـا نبض الحرف والشريان
إذا ما غصت باعماقي .. متى تفهم معانـاتي
على كثر الخطا غافر ولا اغفر غلطة الخوّان
جزاه الصدّ والفرقا ولو عاندت رغبـاتي
ولولا العفو ما اخطينا ولا نحيا بلا غفران
خطايانا دليل إنّا بشر ومنّا الخطا ذاتي
على صدر الزمن بكتب شعوري موعد وعنوان
تعرف الشـوق لو فـتّـشت عن سر ابتسامـاتي
اذا كان الهوى نعمة بحطّك نعمة الرحمن
واذا كان الهوى غلطة بحطّك كل غلطاتي

سعد بن سعود .. منادي

نساي … و انت الهوى بالنسبه لي و الماي
اسمع أنا صوتك و لا تسمع نداي
اشهق أنا باسمك … و اشتاق له و انت معاي
اكتب على سمعي أغاني
اكتب و اغنيك .. حيرتني و احترت أنا فيك
تزعل بلا أسباب … و تعاند و أراضيك
بكل حالاتك أبيك .. بكل زلاتك أبيك
حبـيـبـي انت … و الا العذاب انت
و الا الفرح انت
… مدري وش أسميك
نساي
تغيب و الدنيا معاك تغيب
تقطع خيوط الشمس عني
و يصبح العالم كئيب
و أصبحت أنا لوحدي على
… أرضك غريب
ما تكتفي من غربتي
ما تكتفي من حيرتي
الله كم انت عجيب .. الصمت دايم لعبتك
الصمت احيان رهيب

فايق عبدالجليل

طيب و صدقت الحكي
غلطان غرتني العيون
مادري ان الناس في لحظة تحب
و الناس في لحظة تخون
الناس آه يالناس
حتى في المحبه يكذبون
كنت اتصور حبي في عيونك كبـــــيـــر
همزة وصل تبدى و لا تعرف اخير
كنت اتصور كل شي ممكن يصير
نشوف الكثير … نعاني الكثير
نروح تنفارق
الا اللي شفته .. ماهقيت انه يصير
شي خطير
الناس آه يالناس
حتى في المحبه يكذبون
اجرح مشاعر حبتك .. اكذب علي
اكذب و صدق كذبتك .. اكذب علي
الطيب أنا عادتي .. و الظلم يمكن عادتك
مسامحك روح .. رغم الجروح
نشوف الكثير … نعاني الكثير
نروح تنفارق
الا اللي شفته .. ماهقيت انه يصير
شي خطير

فايق عبدالجليل

زلزليني . . زلزليني
واتركيني فوق بعضي
اغرس الغربه
مابيني و بين نبضي

زلزليني

بغربة الساعة احبك
دمعة الغيمه احبك
بهزة رموشك
احبك
بكل حواس الحب احبك
لما شفتك يا حبيبي
اعترف ان الهوى فعلا قدر
مانفعني كل غروري والحذر
قلبي ضيعني
وحاصرني الخطر
كنت ادور في عيونك
درب حق شوق وممر
ارتبكت وانسرقت
صرت موجه في بحر
صرت في صيفي مطر
صرنا نضحك
صرنا نبكي
صرنا في حالة خدر
زلزليني . . زلزليني

فايق عبدالجليل

عطشان اسمع يا نهر
عمر الصحاري والجفاء
عمري انا ما مر على عمري مطر
عطشان
لدموع الشتاء
مشتاق
للون الخضر
صبري عزف . . صبري نزف
انا النخيل وانا ارتجافات السعف
ناديتك بصوت العطش
شلال صوتي يا الي ما تسمع نشف
شوقي لّوح لك وقف
ترابي لّوح لك وقف
منين ارتوي . . . والدنيا صحرا ء وبس
النار تحتي . . وفوقي عين الشمس
الشتا . . بالصيف اختفى
والغيم ما عنده وفاء
وانا العطش بيتي
ونسيمي عاصفة

فايق عبدالجليل