هلا هلا هلا والله وغلا
قصتيه اللي بكتبها هيه عباره عن مغامرات لعياييز ثنتين وحده اسمها ام هلال ووحده اسمها ام سعيد
أول شي نبدا بأم سعيد
(حليلها هالحرمه كانت في حالها ومالها خص في حد بس من تعرفت على أم هلال شي ياها يعني استخفت شراتها ما تخلي حرمه من الحريم ما تقرضها هيه وام هلال وعندها بنت وحده واسمها مريوم وهيه ما تحب ام هلال ربيعة امها ولا اداني تشوف رقعت ويها)
أم هلال (سي ان ان الحاره)
(هاذي الحرمه وكالة أنباء متنقله من بيت لين بيت وكل علوم الحاره عندها وهذا كله لانها تبيع ثياب و جلابيات وبراقع حق العياييز تقص عليهن تشتريهن من سوق نايف اللي فدبي على عشر ربيات وتقول حق العياييز هاذيلا من القطع الزينه من الهند وتبيعهن حقهن على خمسين ويحليلهن هن يصدقن)
نبدا أول حلقه
الساعه 2 ونص الظهر في بيت ام سعيد مريوم توها راده من المدرسه تعبانه حليلها وتبا تتغدا وترقد نسيت اقولكم انه هالبنت دبلوم فالاعداديه من اربع سنين وهيه راااكه في ثالث اعدادي ما تبا تطلع منه البنت تستفيد تاخذ خبره
المهم حليلها توها بتحط ايدها فالاكل وتسمع صوت ياي من برع بيتهم
ام هلال:ام سعييييييييييييييد يوووووووووووووو ام سعيد وينج انتي عنبو صمخا ما تسمعيني ( وطبعا من دون ما ادق الجرس ولا ادق الباب سيده عفدت فبيت ام سعيد ومريوم توها بتتغدا)
مريوم فخاطرها افففف وصلت وكالة الانباء
أم هلال: وين امج وليش ما توايبين لي يوم ازاقر شو صمخا ما تسمعين ولا ما تبيني احدر عندكم
مريوم: وعليكم السلام والرحمه
أم هلال:دوووووكم منوه يرمس اونها الكاهنه العوده اها بس لا تقطعين السياده من زود الصلاه وانا اقول شعنه المطر منقطع عنا ثرج انتي هنيه
مريوم: انتي الحين شعندج يايه من برع محتشره شو تبين
أم هلال: لابغتج هله شو ابابج انا وانتي شو من المنفعه تيي من وراج امحق انتي حتى الغدا ما عزمتيني عليه
مريوم: قولي جذيه تبين تغدين انزين يبتي ضروسج التركيب وياج عشان ترومين تاكلين( وتخطف مريوم تركض لين حجرتها عشان ما تضربها ام هلول على رمستها اللي قالتها)
أم هلال: غربلها الله شردت ما لحقتها
أم سعيد: مرحبا الساع بعشبه ياااا حيا الله ام هلال
أم هلال: لاترحبين ولا عندج خبر عنبو مخليتني من الصبح عند هالنسره بنتج مريوموه غربلها الله مب لسان عليها
أم سعيد: الله يهديج يا ام هلال مريوم الا ياهل وانتي تحطين حالج من حالها
أم هلال: هاذي ياهل هاذي لو معرسه جان الحين تحتها درزن الا محد يبا يبتليبها هالطمه بنتج
أم سعيد: ام هلال حشمي رمستج انتي تتمنين اصلا لو تخطبينها حق ولدج هلال
أم هلال: لو اخطب له سونيتا سيلانيتنا ولا اخطب له بنتج مريوموه
أم سعيد: انزين شو يايبه عندج اشوف البقشه ممزوره شو فيها من الشي الزين
أم هلال: دفعي اللي عليج قبل عنبو عفنن الفلوس عندج ولا دفعتيهن سلم واستلم الا اقولج ما دريتي عن ام مصبح
أم سعيد : شو فيها خير انشاء الله
أم هلال: بنتها لطوف طلقوها
أم سعيد: وااااااااااااايه ربي لا بليتنا ليش طلقوها شو مستوي بينهم ؟
أم هلال: بعدني ما يبت العلوم اليووووم العصر بشغل رادارتي وبشوف شو مستوي، هيه صدق بتخبرج انتوا عيم ولا عندكم سنه؟؟
أم سعيد: واااااااااابويه شو هالرمسه
أم هلال: عنبو جاني من الصبح عندكم ولا حتى صبيتوا لي فنيان قهوه وااااااااااااااااااايه تراب
أم سعيد: شو قهوته الحين القايله ، أقول ام هلال انتي بوهلال وين عنج؟؟
أم هلال: بوهلال محد فالعزبه عند الهوش
أم سعيد: فالعزبه الحين فهالحر
أم هلال: هيه سار يطالع الهوش ضاربنهن يرب يعل اليرب يضرب بنتج ام كشه
أم سعيد:أم هلال متى آخر مره رايغينج من بيت؟
أم هلال: راااااااااغوج السكن ربي يا بعدي مب منج من اللي ايي صوبج
أم سعيد: أسولف وياج فديت هالخشم
أم هلال: أقول ام سعيد يقولون اليوم مسوين مسيره عندنا
أم سعيد: مسيرة شوووه؟؟
أم هلال : أوين نادي العين فاز فالكوره وعاد سمعت هلول ولديه يقول بيسير المسيره
أم سعيد: واااااااااااااااااااااااااايه تغربلتي تبينا نسير ويا الشباب فالمسيره
أم هلال: ليش شو فيها بنسير بنشجع وياهم
أم سعيد: أم هلال واقع انج محمومه خلي ولدج هلال يوديج الدختر انتي مب صاحيه اليوم
أم هلال: سمعي انتي عزمي وتراه بوهلال بيشلنا فالكروزر بنحط له شرايط عيناويات وبنركب انا وياج فالبدي وبنويه صوب شارع خليفه
أم سعيد: تغربلتي بيعرفونا
أم هلال: ما عليج بنتلثم ومحد بيعرفنا بس انا اخاف لو تلثمت ما يتم واحد من الشباب ما يرقمني
أم سعيد: هيه ما ادري عاد ما بيشوفون ام هلال بيشوفون نانسي عيرم
أم هلال: واااااايه فقدتها يوم الا هاذي راعية بص وطالع اسميني احلى عنها
أم سعيد: انزين هالحين متى تبينا نسير عند أم مصبح عشان نعرف شو مستوي عندهم
أم هلال: بنسير صوبها اليوم العصر وجان ما رمت اييب العلوم من عندهم بطرش سونيتا بشكارتيه صوب بشكارتهم وبخليها تييب العلوم من عندها
أم سعيد: حتى بشكارتج شراتج لاااااااااحووووووووول
أم هلال: هيه عشان يوم اكون انا مشغوله هيه تييب لي العلوم تعرفين يا ام سعيد هاذيلا اهلنا لازم نعرف كل شي عنهم
أم سعيد: هيه نعم صح صح لازم نعرف كل شي عنهم وخلاف نفضحهم فالحاره كلها
أم هلال: أقولج انتي محد اييلس وياج تعلين الجبد بسير صوب ام خليفه بشوف شو من العلوم عندهم
أم سعيد: بتخبرج انتي راسج من يعورج من الحاومه فالشمس عنبو ضد الشمس انتي صدق انج انتي اللي سموها حمارة القايله
أم هلال: وحمااااااره ترمحج قولي آمين يالله برايج برد عليج العصر وبنسير صوب أم مصبح فمان الله
أم سعيد: فداعت الله( فخاطرها تقول فكه منج )

…مع تحيات اخوكم عذاب الشوق