احس بين الضلع جمرات.وأباب عيني وكفة الدمعات.
ونيران وتشب بالگلب ما ينطفن ودوم مستـعرات.
واحس بالنِــفـَـس مكطوع. ولو طلع يچوي بالحسرات.
وبكلشي اذكرك تلزمني العَبرات.
شو فد مرة اگطعت عني الرسايل والكتابات ؟.
شنهو الصار شنهو الجرة وشغير الحَسبات ؟
هيچ انسيت كل الفات؟ يا بذات..
…….
مو انت اوعدت واحلفت. ما انساك ابد هيهات ؟.
مو انت َ الگلت عمري لو گظة بذكرى منك مو حرامات ؟.
مو انت َ الگلت آنة الوفة طبعي و ابد شما حاولوا ما غيروا طبع الوفيات؟.
مو انت َ الگلت شكد ما ابعدت واتغربت ما تبعدني عنك كبر المسافات؟.
مو انت َ الگلت روح الله موَدعك ومحروس بالآيات ؟.
شنهو اطلعت بس بالحچي؟.وتغيرت كل العبارات؟.
هيچ انسيت كل الفات؟يا بذات..
……………
غيروك عني اهل الغدر؟ لو گالوا حبيبك مات؟
اااااااااااخ وك آنة متت من ابعدت عنك تلث خطوات.
آنة كل ليلة اموت واحتضر لو طيفك عَلي ما فات.
لا يا بذات هيچ انسيت كل الفات؟. وبسرعة اللحظات ؟.
….
انسيت لمن نلتقي وتتشابگ النظرات؟
وك انسيت كل حچي الهمس ومراكص الشفات ؟.
وشلون لمن نلتقي ننسى البشر وما نذكر الچلمات؟
الندة البيدي ما يبس من حَضن الايدينات؟.
وعطرك بروحي انحفظ يا معَطر الوردات.
شنهو الصار شنهو الجرة وشغير الحَسبات ؟
هيچ انسيت كل الفات؟ يا بذات …
……………..

رد الحبيبك رد . رد وامسح الدمعات
رد الحبيبك واعلگ شموع . آنة ايامي ظلمة وانتَ لي نجمات
رد الحبيبك راحت الروح . يا كلشي انتَ بالحياة
رد يا نسمة عليلة اتوسلك واتوسل الچلمات
رد يا آنة ويا انتَ ويا كل عاشگ بدنيا العلاقات
وك بيش اتوسلك ؟ بالعشگ؟ لو بالدمع ؟ لو بالحسرات ؟
اتوسلك بكل ذكرى جمعتنا سوة وچان العمر لمن يمر نتحسر على الساعات
هذا الرد الك يلي اتغيرت بچم يوم مو ورة شهور وسَـنـَـوات
وادري متنسى الفات وادري انت مو بذات.