الرئيسية › منتديات › مجلس أخبار ومقالات › العراق بين عصرين
- This topic has 0 ردود, مشارك واحد, and was last updated قبل 18 سنة، 7 أشهر by
من لم يمت بالسيف.
-
الكاتبالمشاركات
-
8 ديسمبر، 2005 الساعة 11:01 ص #47194
من لم يمت بالسيف
مشاركهـــاي مــو عــيــشــة …
عن موقع كتابات – بقلم / شلش العراقي
اختفت البدلة الزيتونية والمسدس والاضابير وحلت محلها السبحة والخواتم الكبيرة والطمغة السودة التي في الكصة .وثنينهم سيماهم في وجوههم .
العلامات الاولى كانت تروعنا والعلامات الجديدة صارت تروعنا ايضا . لقد استبدلنا رفيق شناوة بسيّد طعمة ، الاول رفيقنا العزيز والثاني مولانا الجليل ، الاول جان يمشي والكاع ماشايلته ، والثاني تكول كاعد يصرف علينا ، الاول متخلف دراسيا ومعرفيا والثاني لم يدخل المدرسة الا عندما اصبح اخوه حارسا فيها .
الاول يكرهني ويكلي انت حاقد على الحزب والثورة ، والثاني يكلي انت تكره المراجع، وبين الاول والثاني اعيش سنوات شبابي بالعذاب والحسرة والالم والقلق والخوف ، بشرفكم هذا وطن ؟ هذا وطن اخلص بي حياتي بين شناوة وطعمة ؟ اخواني في السويد والدنمارك وهولندا واخواتي في استراليا وكندا والنرويج وفلندا ، بشرفكم هذا وطن ؟ بضميركم هاي عيشة ؟ انتم ليش ساكتين ليش متحجون الحق ؟ واذا هسة فشرت وطلعت لساني راح تكولون شلش مو مؤدب ويستخدم الفاظ نابية وغير محتشمة . زين راح اجي وياكم ، دلوني على شتيمة قوية ما بيها فشار تشفي غليلي من شناوة وطعمة .
وخاف واحد منكم يكول عوف شناوة راح وكته. لا اخوان ، شناوة بعده بنفس قوته وهسة صار اقوى من كبل , عمي شناوة طلع بلوة سودة ، شناوة رجع يحكم ونزع الزيتوني ولبس دشادشة وشال سبحة سودة مية واحد وحرك كصته ابيتنجانة مشوية . وحط باصابعة خواتم كبيرة وصار ملك الخواتم . . .
اني معليه بي ، خل يصير وزير ، قابل هسة الوزراء احسن من شناوة ،هاي ارزاق واني ما ادخل ابرزاق الناس . بس خل يفك مني ياخة ،ارجوكم كولوله يفك مني ياخة ، مو كل مايشوفني يضحك ويطلع سنونه السود ويصيح :
* ها شلش اللوكي .
بشرفكم اني لوكي . اشك هدومي .اشك هدومي لو تخلوني افشر براحتي .
* اني لوكي شناوة ؟
زين راح اترك شناوة ، وما افشر عليه ، بس شلون راح الزم لساني على طعمة .و سيد طعمة اخوان صحيح لم يكن رفيقا حزبيا سابقا ، لكنه لم يكن سيدا متدينا ايضا .خلال سنة وحدة يصير سيد ومتدين والناس تبوس ايده ،
* مابيها شي قبل جان يخاف وخاتل.
زين هم راح اجي وياكم ،بس ارد اسالكم سؤال .
ليش انسجن طعمة من جان يشتغل نايب ضابط بالاعاشة ؟ .لان جان سيد ؟. لو خطية لزموه يصلي هواي ؟ . لا يمكن جان يقود كتائب التحرير التي دخلت بغداد في نيسان الفين وتلاثة ؟. اخوان طعمة انسجن لان باك المستودع مال الجيش . اي خمط المستودع ونام اربع سنين بسجن ديالى .ومن طلع طعمة من السجن ، مسكين مات من الجوع .لعد فلوس المستودع وين صارت ؟
ها . . . مو خطية اشترى تريلة صفرة ، وشغلها على خط العقبة ، مسكين طعمة لازم يومية نبوس ايده على هاي التريلة الزينة.والله لو ماتريلة طعمة جان احتركت اثاث وزارة المواصلات كلها بالحرب ، بس خلف الله عليه انقذها كلها من الحريق .
هسة اني ليش حارك كلبي ، بلد كامل تفرهد ، صدك اني شعليّة ، بس المشكلة اخوان طعمة ميفك مني ياخة ، هم كل مايشوفني .
* ها ابو العرك .شوكت راح اتصير ادامي؟ تعال اشغلك سايق بالاطفاء .
اني ما استنكف من الشغل ،الشغل موعيب ، بس بشرفكم شايفين مهندس يشتغل سايق بالاطفاء ؟
على كيفك ، راح اتكولون ، اشتغل الجذب ، شلش سوه روحه مهندس . يابا بشرفي اني مهندس ،بعد شتردون . شبيكم مثل طعمة كلكم تحتقروني . ليش اتخلوني ابجي . يابة وروح امي اني مهندس .زين لحد يصدك .هسة انتوا شلونكم عاد …
يالله هسة هو المهندس فد مندلة . مع احترامي للمهندسين .بهاي الايام كول اني سيد ، موالي ، صدري ،مهندس شنو، دكتور بيش كيلو. البلد بحاجة الى سادة وموالين وتقاة وبدريين ومهوسجيين ولطامين لكي نبنيه بناء عصريا .العراق يابان الشرق هاي شبيكم . ليش اليابان بنوها المهندسين ؟ لا بالحسين اليابان محد بناها غير اليابانيين . المهندسين شنو .
الحمد لله ، الامور مرت سلامات . لحد الان اني لازم نفسي ومافشرت ، لا على الرفيق المناضل شناوة ، ولا على سيد طعمة .لان عيب انزل لمستواهم .موصحيح ؟
بس ليش متخلوني افشر وارتاح ؟ شنو ذولة هم رموز دينية .؟.
واحد رفيق والثاني باك المستودع . . . . بشرفكم خلوني افشر .
* ها شكلتو؟
* اههههوووو والله دمرتوني بالاخلاق .
فد مرة بالشتا قبل السقوط بشهرين ، سيد طعمة لاكاني واكف بالركن واجه يمي وبدون ما اساله ،هو حجالي قصة ممكن احجيها الكم وارتاح .واحلفلكم وراها ما فشر عليه .
زين ، طعمة يكول والعهدة على الراوي ،وهو جاي بالتريلة البارحة بالليل شاف وحدة يم ملعب الشعب ، لابسة عباية وتأشر للسيارات ، وطعمة يكول اني استغربت مرية بالليل وتأشر تريد تريلة ، ما معقولة ، يكول لفيت الاستدارة ورجعت طبكت عليها ، المرة فتحت الباب واول ما صعدت طاح نعاهلها بالشارع ، لان التريلة عالية ،يكول طعمة ، شمرت عبايتها يمي ونزلت جابت نعالها .
اني ماراح اكمل القصة التي وقعت كامل احداثها في التريلة لان عيب ، بس ارجو منكم ان تسألوا مرة طعمة. وراح اكتبلكم موبايلها هنا جوة اسمي ، كلولها طعمة مو بات كبل السقوط بشهرين برة البيت وكلج عطلت التريلة بالحصوة .والصبح من نظفتوا السيارة لكيتوا جزدان مال نسوان بي عشر تالاف دينار .
ها طعمة بعدك تريد اتشغلني سايق بالاطفاء ؟ ها سيد طعمة عبالك انسى . افضحك هسة وسويك سالفة بالدربونة .احطك بحلك وكالة انباء نويرة وخنجر وخليك تصير اشهرمن عبد فلك . سيد طعمة ابو . . .
اما شناوة الذي يقول عني لوكي … والله حيرة !! خاف اكلكم اتكولون شنو هالسوء الادب من شلش . وتطلعوني ما متربي وما عندي اخلاق . خلوها سكتة والستر حلو، بس شناوة اذا عاد كلمة لوكي ترى اشره عالحبل وطل خياسه من جان بالخامس ابتدائي ولكفوا بحمام المدرسة لحد ما خلص المتوسطة وصار بعثي .
بشرفكم هذا وطن اخلص عمري بي بين شناوة وطعمة ؟ .جمالة علمونا بالمدرسة وطن مد على الافق جناحا
المفروض يعلمونا وطن بي طعمة و شناوا. . . شناوة دير بالك تكول شلش اللوكي تره تعرف شسوي …اكوم اسوي عشرة شناو واتريك وافلتت لباب الشرجي كبل متمطر الدنيا .
-
الكاتبالمشاركات
- يجب تسجيل الدخول للرد على هذا الموضوع.