اول شي وصله للجزء الأول
http://www.majalisna.com/showflat.php?Cat=&Board=friends&Number=286437&page=0&view=collapsed&sb=5&o=&fpart=1#Post286973

الجزء الثاني
http://www.majalisna.com/showflat.php?Cat=&Board=friends&Number=286961&page=0&view=collapsed&sb=5&o=&fpart=1

سكالي : خيييير موه عرفت ؟
مولدر : قبضيني تلفوني اتصل بال أف بي أي بواشنطن .
سكالي : سلامااات ، نسييت أنه التلفون في الشنطة بو غابت في المطار !
مولدر : يلعنها من حالة ، خلا نشوفلنا بطاقة تلفون ، باغي أتصل ضروري .
بعد ما اشتريوا بطاقة جبرين مال 3 ريال ، و بعد ما انتظر مولدر ساعة عند التلفون العمومي ، والسبب واحد جالس يتصل ببيوت الخلق ، وما باغي يعرفوله رقم تلفونه ، وأخيرا اتصل مولدر واشنطن .
بو باغي يكلمه بواشنطن خلاه شويه بالأنتظار ، دقيقتين تقريبا وبعد دقيقتين قام يكلمه
مولدر : أريدك تتأكد عن تاريخ ….. ( طيييييييط طيييييييط )

حشااااا هالشركة بو عندهم ما تشح الغوازي ، اسميها قاسة على الخلق ، دقيقتين ما كملتهن ، 3 ريااال راحن شربة ماي حال دقيقتين ، ويشوف البطاقة ويقرا مكتوب عليها عمان تل ويقول بالأنجليزي : ” تيييت ” يو عمان تل !!! ( هالتييييت زايدة واجد في التلفزيون تو )

بهالوقت سكالي قالتله : ترااه بطني يصوصو ، قوم نشوفلنا مطعم نوكل منه .
مولدر: أول مرة أسمعك تقولي شي منه فايده ، خلى نشوف مطعم يترس هالكرش .
بعد ما وصلوا المطعم وجلسوا عالطاولة يجيك الهندي : مو في ريد غدا ؟
مولدر : 2 كوردون بلو .
الهندي : هزا مافي معلوم ، يريد برياني ولا مكبوس ؟؟
مولدر : يعني ماشي غير هالعيوش عندك ؟
الهندي : بس عيش بابا
مولدر : يالله بنجرب هالعيوش اليوم ، جيبلنا صحنين برياني دجاج .
الهندي : ويشرب ديو ؟
مولدر ولو أنه استغرب من السؤال قاله : يالله بنشرب هالديو مالكم

بعد ما ضربوا العيوش وترسن الكروش ، خرجوا من المطعم ويقول مولدر حال سكالي :
واشنطن ما ينفعونا ، خلا نشوفلنا مقهى انترنت وأدور بنفسي ، و بعد دوارة ساعتين ، وما بقيوا حد ما سألوه ، حصلوا مقهى انترنت .
دخلوا المقهى وأول ما بدا يستخدم الكمبيوتر ، انتقل حال الثاني ، بعدين غير مرة وانتقل حال الثالث ، بعدين سأل بو يشتغل هناك : كمبيوتراتكم صاحيات ؟
رد عليه : أيوا صاحيات كلهن .
مولدر : عجب ماله كذاك النت بطيئ وهالله هالله بالعافية يفتح جوجل .
رد عليه : تصبر اخوي ، عمان تل هذي

مولدر : مرررررررة ثاانية عمان تل !!! ، أسميها ضاحكة عليكم هالشركة .
صاحبنا استقنع بالموجود وقام يبحث وبعد شوية يقول ، بالفعل كما توقعت
سكالي : اييش معك ، تراني ما جاية هنا عشان ألايعك ود الذين ، خبرني مو عرفت وتوقعت ؟

مولدر : تاريخ 1 فبراير 2003 ، هو تاريخ تحطم المركبة كولومبيا ، وبها التاريخ مكتوب أنه تم الحصول على جثة لمجهول الهوية لابس وزار وفانيلة بو مناكب في مكان الحادث لكن ما ذكروا قدام الصحافة هالخبر .

سكالي : يعنيييي !!!
مولدر يقاطعها : أيوا مثل ما فهمتي ، وأنا قرأت على أنه بعض العمانيين قادرين على الطيران ، واللي شافه صاحبنا أعتقد صار سهل تفهميه ، لا فضائيين ولا غيره .
سكالي : بس هذا الخرتيت بيطلع يعني عمره 3 سنوات بس ، تو نته مو تخرف ؟
مولدر : عن تزهدي حد بهالبلاد ، بو يقدر ينقلب سنور سود في الليل ، قادر ينقلب رجال عود صدقيني
سكالي : والله بديت أشك أنه نته ركبك شي من الجن ، هذا اذا ماحد دقك بعين ، بس أقولك مو مجلسنا بهالبلاد ، خلى مشتلين اليوم قبل باكر .

واشنطن دي سي
الساعة 9.35

بعد ما وصلوا واشنطن مولدر حاول يقنعهم هناك باستنتاجه بأن الخرتيت هو صاحب الجثة و هو عماني قادر عالطيران وشكله هذاك اليوم كان متجاوز السرعة المحددة وصدم بكولومبيا ، بس كلهم قالوله : تراك بديت تخرف وغايتك تتقاعد ( كالعادة يعني ) .

وبهذا انغلق ملف الأكس فايل من عمان ، أحد أكبر الملفات غموضا في خزانة الأف بي أي ، ويبقى الملف غامض كيف بعض العمانيين قادرين على الطيران ، وكيف البعض قادر على التحول لسنانير سودا وكيف الخرتيت اصطدم بالمركبة كولوبيا هذاك اليوم !!!! .

The End
النهـــــــــــــــــــــــاية

أتمنى تكونوا استمتعتوا بالسلسلة وتحياتي لكل من قرء أوشارك بردوده
في الرواية ( عاد سماها رواية )

عاد ما تنسيونا بردودكم الحلوه

منقول من SOFT@HEART