اول شي هذي وصلله للي فاته الجزء الأول
http://www.majalisna.com/showflat.php?Cat=&Board=friends&Number=286437&page=0&view=collapsed&sb=5&o=&fpart=1

يخرج مولدر وسكالي من المستشفى

سكالي : ايش فيها بهلا ؟؟
مولدر : بهلا الله يسمك من أكثر المناطق اللي يزورنها مركبات فضائية على الكوكب ، وكثير من الحوادث الغريبة استوت هناك ، وأني ما راجع بلادي إلا وأعرف مو يستوي هناك بالضبط .

اليوم بو بعده يقرر العميلين يوخذوا باص نقل الى بهلاء ، وياخذولهم باص شركة النقل الوطني ، أول ما دخلوا الباص يهبهم ريحة زيت النارجيل داخل ما أكبوا ، بس مووه بيسويوا قالوا بنستحمل ، وقرروا يناموا ،و يوم صحيوا يلقيوا عمارهم مندفنين وريحتهم ريحة ( الله يخلي بو يقش ” عباد الشمس ” )

يوصل العميلين الى بهلاء وما عارفين من هين يبديوا البحث
سكالي : وتو هيين نروح ؟
مولدر : أنتي روحي و اعمليلك لفة وعرفيلي هين هذاك المخبول – الأمريكي – كان ساكن بالضبط ، وأنا بروح عند واحد باصر
سكالي : باصر !!!؟
مولدر : قرأت عنهم في كتاب للكاتب العالمي جون فالجون ، وأريد أعرفهم عن قرب يمكن يفيدونا بشي .

بالليل يتلاقيوا مولدر وسكالي وتقوله عرفت هين هذاك الهبلة كان ساكن ،
رد عليها مولدر : استعدي الليلة بنروح نشوف كيف يعالجوا من المس .
سكالي : الشيييمة سمحني ، أنا ما جاية هنا عشان أشوف جن .
مولدر : أسميش ما تنفعي حال شي ، بس عندي شغله حالش ، بكرة أريدك تروحي مع الحريم المعصرات وتشلي قهوة وتسألي عن هذا الأسم ” خميس الخرتيت ” .

مولدر يسأل سكالي : ها عرفتي شي ؟
سكالي : كيييه خميس الخرتيت مايت وشبعان موت ( شكلها صارت تتكلم كما العمانيات )
مولدر : ومتى مات ؟
سكالي : هذا مايت بعد 5 أيام من ولدت عصيلة ولدها بو سمه مبروك .
مولدر : ومن اسمه أبوه مبروك هذا ؟
سكالي : علمي علمك بس هن يقولن مبروك ود عصيلة .

يتوجه مولدر وسكالي الى مستشفى نزورى للبحث في السجلات عن تاريخ ميلاد الولد مبروك ود عصيلة ويحددوا تاريخ وفاة خميس الخرتيت بالضبط .
مولدر يوم الشاف الهفسة حيت بو يقصوا الكروت قال حال سكالي نتيه ريضيني هنا ،بسأل الموظف عن الأرشيف ، ووين يخليوا السجلات وراجعلك.

وبعد ضرابة ، واينقطع نصخه اليين وصل عند الدريشة ، سأل عن المكان و خبروه ، رجع حال
سكالي و قالتله : خاسي عمرك وحدك و أنا بتلقاني هنا أداور ، مافيني بارض اليوم .

مولدر راح حيت مواصفينه ودق الباب ، وفتح له واحد شيبة وقال جيب الكرت مالك
مولدر : الكرررت !!! كيييه هذا الأرشيف ما اظني يعالجوا هنا !!
الشيبة : روووح وقص كرت بريال وميتين ورجعلي ، وصك الشيبة الباب بخشمه !

صاحبنا مايله حيلة ورجع يقص كرت كما قاله الشيبة ، وهو راجع يشوف أمة ثقلين من شباب رغود متلايمة واستغرب ، راح يشوف مووه هناك مستوي ، ويحصل سكالي متداورين عليها الرغود منتزقين بو يعق رقم بو وبو ماسك تلفونه يشغل بلوتوث وبو يصورها وهي على نياتها المسكينة ، و يقحم مولدر ويتعها من يدها ويشلها معه .

بعد ما قص كرت ، ودخلوا أخييييرا يدوروا بالسجلات عن مبروك ، و وصلت الساعة 2 ونص – نهاية الدوام – وهم بعدهم يدوروا ،
والشيبة فيه ما فيه و يقولهم : بتطلعوا ولا اقفل الباب ، ورانا عيوش ما فاضلكم أنا ،
الا شوية وتصرخ سكالي : حصلته ، هذا هو .

مولدر : متى مولود ؟؟؟
سكالي : مولود تاريخ 26 يناير 2003 .
مولدر : وهو يحسب بيديه ، 27 – 28 – 29 – 30 – 31 ،،، يعني الخرتيت مايت تاريخ 1 فبراااير !!!

يقولها وهو متعجب : 1 فبرااااااير 2003 !!! أعتقد عرفت شي … .