لدّاد : بَسْ الصوت واصل لسابع جار …. وكمان حاطينلي على هالنسوان المْكَلْحات ..واللي بِمُرّْ من جنب البيت يقول دار لدّاد قايمة قيامتهم
غَبْشَة : شو هسّة صاروا مِشْ عاجباتك النسوان اللي طول النهار تتبصبص عليهن …. ما إنْتَ عيونك رمّدوا من كثر ما خزّنِنْ صور إلهن.

لدّاد : نتفرج آه …نسمع لأ….
غَبْشَة : شوف هالمنطق الأعوج ! … يازلمة … ماظَلْ عندك ريالة من كثر ما سَيَّلْت وإنْتَ تِتْلَمّظ …. على هاي وهاي

لدّاد : والله ياغَبْشَة إنْتَ فاهمة غلط … بَسْ أنا كان عندي ميول من زمان …أصير مطرب …لأنو صوتي جَبَلي وبنفع غَبْشَة :هو إنْتَ كانك سرحتلك بعنزتين يومين زمان على الجَبَل ..صار صوتك جبلي

لدّاد : لا يامَرَهْ … بَسْ أصوات هالطّنْطات مِشْ أحلى من صوتي ….وصوتي بِشِدّْ و بِمِدْ
غَبْشَة : أشوف إفْقَعلَكْ موّال …وأنا بحكم عليه

لدّاد : بِدِّكْ موال وطني وإلاّ رومانسي …؟
غَبْشَة : أي اشي … المهم سمّعني …

لدّاد )يموِّل ) : ياغَبْشَة ياغراب البين …. لِدّي عليَّ زين …تجوزتِكْ بقروش دَين …
غَبْشَة : خَلَصْ …خلص …روح اعملك فيديو كليب

لدّاد : جد صوتي حلو … وبنفع ؟
غَبْشَة : مِشْ مهم ينفع وإلا ما ينفع …أهم شي تلاقي الداعم

لدّاد : إنْتِ أكبر داعم إلي … إنْتِ غَبْشَة حياتي
غَبْشَة : ايش لدّودتي.. بدك إيّاني أرقص معك والا أمسكلك شِبّابه ؟؟

لدّاد : أنا الفنان …إنْتِ شو دخلك بالفن … إنْتِ تدفعي بَسْ
غَبْشَة : شو يعني أدفع …؟

لدّاد : يعني تقومي معي نبيع هالقلادتين اللي معك … ونبلِّش نْفِنْ بعدها
غَبْشَة : وأنا ما راح أطلع بالكليب ؟

لدّاد : اذا طلعتي فيه والله ما ترضى ولا وحده من هالمزيونات تجي معنا
غَبْشَة :ليش إنْتَ بِدَّكْ تجيب بنات ؟

لدّاد : والله ما أخلي وحده تعتب علي … هما اللي يجيبوا بهالنسوان أحسن مني ؟
غَبْشَة : أنا بدفع وإنْتَ بتفن مع هالماسخات … والله أحلى من هيك منطق ما فيه …

لدّاد : بَسْ النتائج مظمونة …. يا غبشتي
غَبْشَة : لا غبشتي ولا نبشتي … علي الطلاق لو بتساويها ليكون آخر يوم إلَكْ على ذمتي …

الى اللقاء في الحلقه القادمه من يوميات لداد السارح