ما اقوى على فرقاك يا زين ما اقوى
لكن خسارة وش يفيد التمني …..؟

امر تدلل واطلب العمر فدوى
وان كان ما يرضيك خيبت ضني

هجر الاحبة للمحبين بلوى
وش حيلتي حكم الظروف اجبرني

ماعاد لي من بعد فرقاك سلوى
القلب يبكي والليالي كوني

وش فايدة دنياي وش عاد تسوى
من غيرك انته ياغرامي وفيني

يا مالك قلبي انا ارجوك رجوى
تسال خفوقك واقبل العذر مني

لا لاتسيئ الظن وتقول هقوى
عطني صحيح العلم لي جاك عني

بحيا على ذكراك وان مت فدوى
فداك العمر والفرح والتهني….