الواحد يتسغرب إذا قلت له أن النحبة اللي هيه الكحة له إيجابيات وفوائد

هيه بصراحة فائدة وحدة ، حصلت عليها فجأة وصدفة ورب صدفة أنقذتني من ورطة

المهم وأنا رايح للمسجد اليوم لصلاة المغرب ، والغريب أنه اليوم بالذات كانت النحبة أقل من اليومين الفايتات

وكالعادة ولله الحمد أكون آخر المصلين ، وقبلي مباشرة جارنا الشيبة ( ترى المسجد صغير وأكثر الأيام يكون عددنا أربعة أو خمسة مع الإمام )

انزين وجارنا الشيبة اللي يعطيه الصحة ما أدري أيش فيه اليوم ملاحظنه سرحان من قبل لا أقيم لصلاة الجماعة

يعني ما عادته يسرح كثير ( بس يجيله بعض الأحيان ) اليوم وبعد ما خلص الشيبة صلاته خرج وراح رجم الباب من الخارج ( حلّق عليه ) يعني سكر

على الباب بالمرجام ، وبالصدفة وأنا في التشهد جاتني الكحة ، وماانتبهت إلا والشيبة يفتح الباب مرة ثانية …..
وما كنت منتبه له وهو يسكر الباب ………
بعد ما سلمت وخلصت صلاتي أكتشفت أنه لما سمعني أتنحب انتبه انه مازال حد موجود في المسجد اللي هوه أنا

سبحان الله يعني صدفة ، هذا مايعني أني كثير التركيز والخشوع في الصلاة بل العكس للأسف وممكن صوت خارجي بسيط يضيع تركيزي في الصلاة ،،لكن لكن لكن

،لكن هذي المرة كانت النحبة صدفة فقط ، وقلت سبحاااااااااااااااان الله .

على فكرة : هذي ما أول مرة الشيبة يسرح فيها ويسكر علي الباب بل الثانية بس
في المرة الأولى أنا كنت مخلص مصلي وكنت جالس أزيد من الأدعية وقراءة قصار السور ، فلما عرفت أنه يسكر علي الباب على طول قمت وناديته ، ومسكين عاد جلس يستسمحني ….. الله يعطيه العافية إن شاء الله .