أخواني…..

هذه مشكلة جادة موجودة في مجتمعنا العماني.. والجهات المعنية لا توليها أي اهتمام، بالرغم من عواقبها الوخيمة والسلبية.

ألا وهي مشكلة عدم وجود مكان يسهر فيه شبابنا، وحتى العائلات.

1- الشباب الرجال: يشربوا قهوة أو شيشة ويضربوا سوالف على الكوفي شوب، أو يحوطون في المراكز التجارية لحد الساعة 9:30 وبعدين تنقفل المجمعات، يروحوا يمشوا على البحر ويشربولهم بارد/ مع ساندوتش يمكن. يملون من الجلسة.. لأن الشاطي ما فيه أي حركة غير ناس رايحة وجاية فقط، بعضهم يجلس وقت أطول لأن عنده

موهبة العزف ، فيعزف ويسلي نفسه لحد الساعة 3 أو 4 الفجر.

2- الشباب البنات: يتمشون في السناتر يتفرجوا على آخر العطور والماكياجات والملابس، لحد الساعة 9:30 وبعدين تنقفل السناتر، يروحوا مطعم يتعشون، أو يروحوا يمشوا على البحر ويتعشون، ما يقدروا يجلسوا لساعة متأخرة لأن المكان كله رجال وغير آمن كفاية، يعني أول ما يخلصوا العشاء يردون البيت.

3- العائلات (زوج وزوجته): يطلعوا من بعد المغرب، يروحوا كوفي شوب أو مطعم يسولفون.. ويسولفون.. ويسولفون.. ويسولفون.. ياكلولهم ويشربولهم حاجة، توصل الساعة تسعة أو عشرة.. يمرون أحيانا على الشاطيء بس ما يقدرون يطولوا أكثر من الساعة 11 (شكلهم ما حلو، ويدعو للشك) يردون البيت ويكملوا سهرتهم بالبيت (ايش الفايدة طلعتوا لو ما طالعين ما أحسن؟).

4- العائلات (زوج وزوجته والأولاد): يطلعوا من العصرية، يروحون مشوار خاص بأطفالهم مثل حديقة أو قاعة ألعاب، توصل الساعة 8 أو 8:30 صار لازم يعشوا أولادهم وهم يتعشوا بالمرة ، يروحوا مطعم أو ياخذولهم ساندويتشات بارسل ويروحوا البيت.

ذكرت أربع حالات مختلفة، لكن الشيء المتشابه في جميع الحالات هو انه في النهاية ما يعرف الجميع وين يروح، كل شيء متسكر الا المطاعم، يعني بنجلس ناكل لحد الساعة 12 بالليل مثلا؟………….

لكن فيه مكان واحد مفتوح..

واو.. فيه مكان مفتوح..

فيه حل.. واو…

ايش هو؟

ايش هو ؟

البارات والملاهي والمراقص الليلية…

تعرفوا لحد متى مفتوحة؟

لحد الفجر….

يعني الكل يقدر يروح هناك بعد ما تنقفل باقي الأماكن… كل الحالات الاربعة اللي ذكرتها يقدروا يروحوا لأن الباب مفتوح لهم..

معقولة؟… هذا اللي صاير؟..



وهنا تبدأ قصة ضياع شبابنا وشاباتنا..

الواحد يبي يسهر لكن ما فيه مكان محترم يستقبله..

في البداية بيروح الشباب الى المراقص من باب التفرج والفضول والوناسة… سماع أغاني.. هزات الجسم انسجام مع الأغاني وهو يشرب عصير برتقال أو بارد .. وبعد كذا بيرقص مع وحدة.. ايش فيها يعني؟.. عادي مافيه أي خطأ……….. وبعدين… لازم لازم لازم بيوصل لشرب الكحول .. ما حد يقدر يقنع الناس انه يدخل المرقص بدون ما يذوق الخمور.. يمكن في البداية لكن ما بيظل الحال على كذا.

وصدقوني أنا ما ألوم الأهل أو عدم مراقبتهم.. دايما نلوم الأهل.. الأهل بيراقب ايش ولا ايش.. بيراقب أي ولد أو أي بنت من العيال..

لو كان هؤلاء الشباب محصلين مكان مفتوحلهم ما كانوا انحرفوا أو حتى عرفوا مكان هذه المراقص.

أصلا كافي نوعية الناس الموجودة في المراقص والمشاكل والضرابات اللي تصير هناك.

وبعدين ي الجهات المختصة.. الى متى نستقبل جيل أخس من اللي قبله.. الى متى؟

لكن مين انت تكلم… ولا حياة لمن تنادي

أرجوكم ضموا صوتكم لصوتي؟