قالت غريبه لام حبيبه طب انتي مستنيه ايه

ريحي نفسك و نجي حالك و بسرعه يا بنت الايه

مش معقوله حالك واقف وانتي بتتفرجي عليه

ده لو كانت ست قطاطا لقلب راسه بين رجليه

بتطلب حريه او خلع ودي حسبة كم جنيه

  

ده متعصب ولا جنوني و مصدع راسك بالشخير

منع عليكي النت والفسحه وكانك ثائره من التحرير

عامل عنتر وشايل سيفه وهو ما حصلش غفير

وبيقلك ليه لابسه كده الفستان ده عليكي قصير

وهو طالع نازل يا عيني لوحده  ومدلع حاله  العصير

  

وانتي بقيتي هامله حالك و ما يمرش عليكي يوم

ضايع وقتك بين طبخ و مقلى وريحتك بقت  بصل وتوم

والبيه قاعد ومريح راسه ورامي عليكي الهموم

يشخط  و ينطح و فيكي يجرح لتخويفك عند اللزوم

  

ليه راضيه بعيشتك ديت و انتي حلوه وزي الفل

فين البسمه فين الامله فين نورك  يا ست الكل

ناسيه نفسك و مطاطيه راسك و مخليكي بحاله ذل

مش عيب على حد متعلم بيتحكم فيه جاهل و دهل

  

دي القطه لو حصروها حتخربشهم بالمخالب

والعاقله تفكر بمستقبلها و تامن ليها فلوس و راتب

واللي يعتمد ع البخيل حيصبح  عليل وديما بابه كده  موارب

وقالوا زمان ديل الكلب ما يتعدلش حتى  لو حطوه بقالب

  

ده انا لو كنت مكانك لاضرب حالي بالقبقاب

ولاخلع جوزي و اخلص منه و اقفل بوشه الابواب

ومش حتقبل ابدا عذره حتى لو كتبلي الف جواب

ده احنا نعيش زمن الحريه و خلصنا من قانون الغاب

  

بترد عليها ام حبيبه

عايزه اقولك اللي فيه  اصلك مش عارفه حاجه  

انا تعبانه ونفسي ارتاح واطلع بقه من عنق زجاجه

زوجوني  ليه وقالولي ده اصله ابن المهراجه

وانا برضك رضيت وقلت اهو  مش خسرانه حاجه

  

اه لو تعرفي اللي فيه بس خايفه على بيتي وابني

ياما حلمت بحبي  وياما على امل اللقاء ببني

حبي اللي متربس حالي اصله كتير عليه غالي

وعند كلامنا انسى نفسي وافضل كده طايره بالعالي

  

كنا بنغني مع بعضينا ونرقص ونتكلم احلى كلام

ومرت علينا ايام حلوه و بعديها قلبت علينا الايام

ليه يا دنيا تغدري فيه وانتي عارفه و مخبيه عليه

فرقتينا و عذبتينا  و بتعذبينا كل شويه

نفسي ارجع لحبيبي واقله عاللي فيه واللي جرالي

ولو كان حد القمر حطله و افضفض ليه لاريح بالي

عايزه اقول مع اني حلوه ولسه في عمر الشباب

الوحده هدت حالي وخلت شعري من الفكر شاب

حفضل كده مربوطه بساقيه وامسح دمعي بالتراب

ليه مخترتش قبله حبيبي وجنبت حالي من العذاب

واخر كلامي  عايزه اقوله خلي بالك من  صحتك

الصحه لو راحت يوم مش حتلاقي اللي يساعدك

وانت وعدت من زمان ويا ريت توفي بوعدك