إوعى تسيبنا

طَلِة وِشَّك ..

بتشبعنا لآخر الشهر

حتى بطونَّا كتير تدعيلك

دخلت جِوه

بآخر قوه

واحنا ياريس مالناش ضَهر

إنت زعيمنا

إللى شاكمنا

ومورينا نجوم الضُهر

إنت عريسنا

إنت فارسنا

ومشرَّبنا ليلاتى القهر

إنت عريسنا..

متجوَّزنا

غصبن عنَّا ومن غير مهر

إنت فارسنا..

تمللى راكبنا

واحنا عشانك نحنى الضَهر

* * *

كنَّا زمان بالروح والدّم

نفدى حبيبنا إللى راعينا

طلعت روحنا

وكتر جروحنا

خللى الدم

مبقَاش فينا

نفدى بإيه دلوقتِ ياريس؟

بكلاوى فاشله

ولاّ اورامنا

ولاّ بكبده صَبحِت طينه

نفسنا نخلع

بس هنخلع ونروح فين

واحنا ولاد البطه السوده

عايشين فيها بقالنا سنين

سته ف صاله وخمسه ف أوضه

لأ ياحبيبنا

إوعى تسيبنا

بنحب معاك..

أيامنا السوده

* * *