لما تعوز يبقالك معنى……..وحياة صافيه الصدق ماليها
لما تضيق حواليك الدنيا……..ويكون قلبك ضايع فيها
لما تموت جواك أحاسيسك………وبقيت مش قادر تحييها
لما الناس فى المحنه تسيبك……….وتروح مهما تنادى عليها
لما جروحك تفضل انزف ………ومافيش شىء ف الكون يداويها
أوعى تروح للناس ف الدنيا……..هى الناس فى ايه ف ايديها
سيب الخلق وروح لخالقهم………سيب الارض وروح لباريها

آثار الدواء

هيخليك انسان له معنى…………..هيخليك فعلا انسان
يأخد قلبك فوق ويرفرف………..وسط قلوب مليانه ايمان
هيخليلك روحك تبقى…………أسمى وأقوى من الأحزان
هيخليلك قلبك ثابت ………..ولا يستسلم مهما ان كان
أنا مش حأفضل أعد فوايده………..أصل فوايده فوق الحسبان
بس كفايه أقولك انك…………….. يومها هتبقى مع الرحمن

التركيبه

حبة صبر وحبة تقوى………….وتدوبهم ف الاخلاص
لازم يبقى الصبر ف قلبك………….ثابت مش مكتوب برصاص
والأفعال هى اللى تعبر………..مش شعارات تنقال وخلاص
وكفايه تعرف مهما الدنيا………….فضيت حواليك م الحراس
لازم تعرف اننا لينا………… رب مافيش من حكمه خلاص

الجرعه

خد على قد ما تقدر منه ……………خد ماتقولش ازاى ولا ليه
عوّد عقلك ..روحك..قلبك…………..طول أيامك يمشوا عليه
وأوعى تسيب ولا ثانيه تعدى……. من غير قلبك مايعيش بيه
وان أدمنته ده شىء من حظك…….. طب فيه أجمل من كده ايه؟

التحضيرات

ركعه ف قلب الليل تخفيها………….ويا دموع تبكيها بقلبك
صدقه ماحدش يبقى شايفها ………علشان تطلع خالصه لربك
فرج كربة حد فى أزمه……… حتى ان صدفه قابلته ف دربك
الأعمال لو حتى بسيطه……….. بس تكون ممزوجه بحب
رب الكون ده حيقبل منك……… والأجمل …ربنا هيحبك

الآثار الجانبيه

كل آثاره انك م الفرحه………. قلبك ممكن نبضه يزيد
وكمان ممكن تشعر انك…… جرى فى عروقك دم جديد
ممكن وشك يبقى منور…….. باسم وكأن انت ف عيد
يعنى عيوبه مجرد انك……….. تلقى كيانك كله سعيد

موانع الاستعمال

مش ممنوع للدنيا بحالها…. حتى العاصى ماهوش ممنوع
عمر زمان ومكان ما حيمنع… طول ما ف قلبك لسه خشوع
لو جه يوم أخطأت طريقك ……..لسه بايدك تانى رجوع
دايما دايما خليك فاكر……….. لسه بايدك تانى رجوع
لسه بايدك تانى رجوع………… لسه بايدك تانى رجوع

منقوله