العبيط كلمة عربية فصحى

في المعجم الوجيز
**************
يقال رجل عبيط يعني أبله غير ناضج
و العباطة هي البله و عدم النضج

و في مختار الصحاح
***************
يقال مات فلان عَبْطَةً أي صحيحا شابا
و العَبيط من الدم الخالص الطري

**********

طب تعالوا بقى نشوف كلمة عبيط دي دلوقت يعني إيه

لما تبقى كريم
لما تبقى أمين
لما تبقى مؤدب
لما يبقى صوتك منخفض

لما تكون مش منافق و لا ماسح جوخ
لما تكون مش كداب و لا بتنقل كلام

لو حد شتمك و ما ردتش عليه
أو بس قلت له الله يسامحك

حقاني و تقول كلمة الحق
و لو على نفسك أو أقرب الناس ليك

لو زميلك في الشغل خلاك تخلص الشغل
و هو قاعد مش بيعمل حاجة
و بعدين يقول أنا اللي اشتغلت الشغل كله

لو رفضت تقول في التليفون ان زميلك مش موجود
زي ما هو نفسه واقف جنبك و بيقول لك تقول كده
لو بتعتبر إن مجرد إنك تقول كده كذبه كبيرة

لو قلت لزميلك القريب قوي منك سر
و لقيت تاني يوم الناس كلها عارفاه

لما ترفض انك تعمل اللي بيعملوه كل زمايلك في الشغل
و تقول ده غلط و حرام و ها تروحوا من ربنا فين
و هما يقولوا لك كل الناس بتعمل كده … و انت تقول لأ

لما يقولوا لك إربط الحمار مطرح ما يقول لك صاحبه
و انت تقول لأ – لازم الصح هو اللي يتعمل

لما تدور على كل قرش بتكسبة ده حلال و لا حرام

لما تظن في الناس كلهم خير
كل الناس طيبين و مافيش حد وحش

لو أي واحد يقول لك أي حاجة تصدقه
و تقول طب و هو ها يكدب عليا ليه ؟؟

لما الراجل يبص لكل البنات و الستات على انهم إخواته و بناته
و لما الست أو البنت تبص لكل الرجالة على انهم اخواتها

لما واحدة تقول لك هيت لك
و إنت تقول لها معاذ الله زي سيدنا يوسف
ده كده حرام

لما تشوف واحد أو واحدة قاعدة في الشارع بتشحت
و تديها جنية و لا خمسة و لا عشرة
و انت بتقول في نفسك ده مبلغ قليل قوي
طب ها تعمل بيها ايه و لا ايه

لما تشتري و تبيع من غير فصال و لا مساومة
اللي بيقولو لك عليه بتدفعه و انت ساكت من غير فصال

لما تفرمل عشان قطة معدية الشارع و انت سايق
لما توسع لعربية كسرت عليك بسرعة

لما تقف عشان ست أو راجل كبير بيعدي
و العربيات كلها وراك تضرب لك كلاكسات
و تقول ده عبيط ده و لا ايه

لما واحد يشاور لك و انت راكب عربيتك
و تقف له و تاخده توصله في سكتك

لما صاحبك يقول لك سلفني عربيتك
عشان أروح بيها مشوار و لا فرح
و انت بكل بساطة تقول المفاتيح أهي
بس لو سمحت إبقى خد بالك

لما واحد ييجي يقول لك محتاج فلوس و إنت مش معاك
و تروح تستلف له من حد تاني
أو تنزل معاه بسرعة
تسحب له فلوس من البنك قبل ما يقفل
لأ … و ممكن تديله الكريدت كارد بتاعك كمان لو مش قادر تنزل

لما يبقى مافيش في بيتك غير أكلك و أكل ولادك
و لو جالك ضيف يبقى لازم تعشيه

لما جيرانك يطلبوا منك أي حاجة في بيتك
من التليفزيون الصغير لغاية حتة تلج عشان الحر
و ما تقدرش تقول لهم لأ

لما تعمل حساب شعور لجيرانك أو قرايبك
و تأجل فرح ابنك أو بنتك عشان عندهم حالة وفاة

لما تبقى مصاحب عيالك
و بتخرج معاهم تتفسح
وتدخل سينما و تتمشى و تهرج زي الشباب

لما ما تقدرش تشوف و لا تسمع طفل بيبكي

لما تقوم لراجل أو ست كبيرة في الاتوبيس أو المترو
و توسع للي نازل أو طالع على باب المترو
و ما تزقش الناس و لا تقف متنح على الباب

لما واحد يخبطك كتف في الزحمة
و انت اللي تقول له متأسف

لما جزمتك تتسرق من على باب الجامع
و تقول يمكن اللي سرقها ماعندوش جزمة
هو أكيد محتاج .. أمال سرقها ليه ؟؟

لو كنت في رحلة و معاك كولمان ميه ساقعة
و الناس اللي حواليك خلصوها لك
و قعدت بعد كده تشرب ميه سخنه

لما تقعد على القهوة مع أصحابك
و كل مرة انت اللي تدفع الحساب

لما واحد يدخل قدامك في أي طابور
و تقول معلش يمكن مستعجل و لا تعبان
و لا بالكتير قوي لو متغاظ قوي يعني
تقول أستغفر الله العظيم

لما تروح عروض الأوبرا و مسرح الجمهورية
و تسمع تشايكوفسكي و بيتهوفن و شتراوس
و عبد الوهاب و الست و عبد الغني السيد
في زمن العنب و البلح و شيال الحمول يا صغير

لما تقعد على قهوة البورصة طول الليل مع شباب زي الورد
تتكلموا في كل حاجة و ترسموا أمل في مستقبل جميل

لما تستأذن الأول قبل ما تشرب سيجارة
و تقول للي جنبك هاضايقك بالدخان ؟؟

**********

يعني باختصار

العباطة في الزمن ده

هي أخلاق الشرفاء و الطيبين
هي أخلاق الفرسان

هي الإيمان بالقيم المطلقة اللي
كانوا بيقولوا لنا عليها زمان

الحق و الخير و الجمال

**********

عموماً و على كل حال

و بناء على ما تقدم

و بعد الاطلاع على ما سبق

أعترف لكم و أمامكم
و أعترف لنفسي اولاً
و بكل صراحة

يا هشام يا ابني
أنت عبيطٌ عبيطٌ عبيط … يا ولدي

**********

و من المؤكد أن فيه ناس كتير زي حالاتي

و لكني أُعلنُها من هنا صريحةً مدويةً

إني أفتخر بأني عبيط

و سأعلم أولادي أصول و فنون و قواعد العبط
و سأعلمهم كيف يحملون من بعدي لواء العباطة

مش باقول لكوا
أنا …. عبيط

يا عبييييييط