في عصرية من العصريات قرر اخوكم في الله ان يحارب ظاهرة السلف عند بعض الاصدقاء الغير عزيزين علي. فكرت بيني وبين نفسي وقلت: يارجال كل شوي يجيك واحد يتسلف ويقولك ان شاء الله يومين برد لك المبلغ, وبس ياخذ الفلوس على قولهم وهذا وجه الضيف. قررت اني لازم ادور عليهم واحد واحد واقولهم ردوا الفلوس بدون ما أستحي منهم.
اتصلت على ابو عبدالله, وهذا اكبر سلفنجي, وقلتله: يابو مشاري تذكر يوم طلعنا نتعشى انا وانت ذاك اليوم؟. قال: متى, ما اذكر. قلتله يوم طلعنا مطعم الجوهرة. رد علي: اها اي اذكر, ليه وش صار. قلتله: ماتذكر انك انت طلبت معسل بعد العشا وكانت قيمة المعسل 12 ريال. قال: ما اذكر, الكلام ذا من سنة تقريبا. قلتله انا اذكر وانت كان معك عشرة ريال والباقي كله ميات وماعندك صرف ودفعت انا الريالين عنك. قال: اي وخير يعني مافهمت وش تقصد؟. قلتله: اقصد اني ابيك ترجع الريالين اللي استلفتهم مني. قال: الحين ماتستحي على وجهك؟, داق علي ومزعجني على ريالين اخذتهم منك, يبا نعطيك مية ريال. قلت : لا انا ابي فلوسي حقي يعني ريالين. ***** طبعا النجوم هذي عزيزي المتصل عشان ما اقولك وش الشتايم والسبات اللي اتحفني بها المدعو ابو عبدالله, وبعدها قفل السماعة في وجهي.
أنا مستغرب منه هالاسلوب. يعني انا صاحب حق وابي حقي فلوسي. مع ان المبلغ ماهو كبير ابدا عليه وهو دخله ممتاز وميسور الحال. ليه يبي يجحدني في ريالين؟
على العموم انا من أول حاس انه مصاحبني عشان مصلحة والحين شكله اخذ مصلحته مني وأنكر علي فلوسي. لكن الله ينصرني وارجع فلوسي منه.

حكمة احفظها زين عزيزي المشترك

سهل تاخذ من الناس فلوسهم وصعب تاخذ فلوسك من الناس.

7 أبريل، 2009 الساعة 5:01 م #1261262